पुरुषप्रधान संस्कृतीला शह देण्यासाठी आणि महिलांवर होणा-या अत्याचाराला प्रत्युतर देण्यासाठी काही महिला उत्स्फुर्तपणे एकत्र आल्या. स्त्रीला दुय्यम लेखणा-या समाजातल्या प्रवृत्तीला ठामपणे नकार देण्याची आतंरिक इच्छा प्रत्येक स्त्रीच्या मनात खरतर नैसर्गिकरित्या असतेच. याच खोलवर दडलेल्या इच्छेला अभिव्यक्त करण्यासाठी एक व्यासपीठ स्त्रियांना मिळवून देण्याच त्यांनी ठरवलं. स्वतःचे हक्क आणि अधिकार जाणून घेऊन आपल आयुष्य सुरक्षित आणि सुखकर बनवू इच्छिणा-या महिलांना दिशा देण्याच काम त्यांनी सुरु केलं. आपले विचार आणि भावना मनमोकळेपणानं व्यक्त करण्यासाठी, त्यांची देवाणघेवाण करण्यासाठी स्त्रियांना हक्काची जागा मिळवून देण्यासाठी धडपड केली. जिथे आत्मविश्वासानं आणि मुक्तपणानं, निर्भयतेनं आपल मत व्यक्त करता येईल अस ठिकाण मिळवून दिलं. पुरुषांच्याइतकीच किंबहुना त्यांच्या बरोबरीन स्त्रियांना सन्मानाची, आदराची, स्नेहाची वागणूक, दिलासा देणारं एक केंद्र यामुळे मिळालं. आणि या सगळ्या धडपडीत एका बाजूला संस्था उभी राहायला लागली तर एकीकडे या स्त्रियांमध्ये आत्मविश्वास, निश्चय, निर्भयता या गोष्टी वाढत गेल्या.